انا مش بهزر. انا بتكلم جد.
حتى انا افتكرت دلوقتى رجل سعودى كان عاوز يعمل موقع زى لعبة ترافيان .. و كان بيدور على فريق برمجى يبرمج له سكريبت مشابه لترافيان .. مع الفرق ان اللعبة تكون بين المصريين و السعوديين .. و يكون فيها حروب برية و حروب بحرية .. يعنى حرب بالسفن و الغواصات و كدة ..
و فعلا وجد مبرمج يبرمج له هذا الاسكربت .. لكن السعر كان غالى على الراجل .. المبرمج كان عاوز 55 الف ريال .. و ينفذه فى فترة لا تقل عن 8 شهور.. الراجل عرض عليه 40 الف ريال .. لكن المبرمج رفض.
طبعا الراجل اللى كان حايدفع 40 الف ريال دة . هو فاهم بيعمل ايه. و عارف كويس انه ممكن يعوضهم فى اول سنة او سنتين.
بالنسبة لان موقع محكمة نت بيعوض عمل حكومى .. فعاوز اقول ان ليس هناك اى قانون عربى يحمى تعاملات الافراد على الانترنت .. لا يوجد سوى قانون واحد فقط و هو خاص بالتوقيع الالكترونى..
و اى كلام بيتكتب على صفحات الانترنت سواء فى منتديات او فى ايميلات خاصة . يعتبر ليس له قيمة فى الاثبات.
يعنى مثلا ما ينفعش انى اشترى موقع من واحد عن طريق ايميلات .. و يكون مكتوب فيها اعتراف من البائع انه استلم تمن الموقع .. و اروح ارفع قضية و اطالب بحقى استنادا على الكلام المكتوب فى الميل...
طبعا القضية حاتترفض من اول جلسة.
لو اى حد جرب و راح مباحث النت و قالهم انا اتنصب عليا من فلان الفلانى.. اول سؤال بيسألوه .. معاك دليل كتابى على كلامك؟
طبعا الرد لا.... حايقولك لازم يكون فى اى دليل كتابى علشان نطلع تأشيرة من النيابة.
يعنى عاوز اقول ان الحكومة و القانون علشان يسدوا الفراغ دة .. و لا 50 سنة.... لان دى محتاجة تشريع و قانون يطلع من مجلس الشعب.
معلش انا شغلتى محامى(و حكاية الدعم و التصميم دى هواية و لا يمكن الاستغناء عنها) و مسكت قضايا الكترونية كتير .. و اخر قضية هى قضية هيثم اللى نصب فى 5 مليون دولار.... طبعا الكل عارفه.
اما بالنسبة لحكاية استغلال الويب العربى لفكرة النصب . فا دة مثل على ناس بتفكر و ناس بتفهم...
يعنى ممكن برده واحد يستغل الحكاية دى فى محتوى تانى ... ازاى؟
دلوقتى فى طرفين بيتعاملوا مع بعض .. واحد حايدفع فلوس .. و واحد حايكتب مواضيع مثلا او يصمم موقع او اى حاجة؟
و طبعا الطرفين مش واثقين فى بعض.
ممكن يتعمل موقع و يكون وسيط بين الطرفين .. يستلم الاموال من الطرف الاول . و لا يسلمها للطرف الثانى الا بعد الانتهاء من العمل . و ياخد نسبة بسيطة .... طبعا حايكون تعب فى الاول و الناس مش حاتثق فى الموقع بسهولة .. لكن مع الوقت اكيد ستتواجد الثقة.
زى موقع سيدو اللى بيعتبر وسيط فى بيع الدومينات...
يعنى كلها مجرد افكار جديدة ... حتى لو موجودة فى مواقع اجنبية و مش موجودة فى مواقع عربية .
المهم ان اى فكرة تعمل موقع ناجح افضل بكتير من المنتديات و الكلام دة.
تحياتى لكم
|