[خالد العميري]

بسم الله الرحمن الرحيم
من أصعب الأوقات اللي تمر علينا في ابعاد المعلومات هي اللي تسبق طرح منتج جديد خاصة اذا كان ينتظره عملاؤنا بحماس واندفاع لدرجة ان بعضهم تقول وده ياخذ مشعاب ويطب علينا !!

العميل :
هاكم فلوسي وهاتوا برنامجكم لاحوفكم حوف

ابعاد :
ياخوي باقي ماخلص شغالين فيه والله باقي

العميل :
اقول هات اخلص باقي ما باقي ماعرف خذ الدراهم وركبوه على موقعي تفهم انت ؟

ابعاد :
طيب ابشر بس خله يخلص اول

عاد على هالحال فترة طويله من اول ما بدينا في الكمبو الجديد قبل حوالي اربعه شهور

كثير طبعا يفكرون الشغله ماتحتاج وقت وتعب لكن وين تشرح له مايمديك اصلاً تقول شيء

احيانا نفكر ونقول :

ابعاد 1 :
طيب لو بطلنا نسوي الكمبو وش بيصير ؟
كيفنا ياخي معاد نبي

ابعاد 2 :
كيفنا ؟؟ صاحي انت ؟
وين كيفنا الا بياكلونا اكل ، تجي هالحين تقول بطلنا ؟

ابعاد 1 :
طيب وشفيها ماخذنا من احد مبالغ ولا لاحد عندنا شيء خاصة الكمبو حق الخواجات مهوب لنا يادوب حنا نسوي له تطوير ونترجمه ونصمم له ستايلات يعني اساساً برنامج اجنبي وفيه شركه مسؤله عنه !

ابعاد 2 :
اقول لا يكثر
خلنا نكمل بس ونخلص ونطرحه للعالم اللي تنتظر ومتعشمه فينا .

ولاننا صرنا تحت ضغط نفسي رهييييييب قررنا نعمل ورشة عمل بحيث ننهي اللي بديناه بأسرع وقت ممكن
تقابلنا في مكتبنا بالعليا في قلب العاصمة السعودية الرياض <<<< حلوه العاصمه السعودية الرياض

يوم الاربعاء قبل شهر رمضان بأسبوع تقريباً
محاكيكم وابو نواف ووائل واحمد

اعرفكم على الشباب :
ابو نواف ( م. محمد عبدالله ) مبرمجنا المعروف عاد هذا الادمي ان اشتغلت معه عز الله بتكره نفسك لامسك بك خط انسى تروح او توقف قبل تنهون الشغله ماشاء الله عليه وحكاية تمشي شغله بطريقة مشي حالك مع ابو نواف انقزها لازم منتهى الدقه والتفصيل
وصعب تقول له تعبت اذا قلتها له على الماسنجر طلع لك من الشاشه وسحبك مع رقبتك :

اقول اشتغل بلا تعبت بلا كلام فاضي
اجل لو تقولها له وانت معه قدامك اذا سلمت جبتهك زين


وائل اديب : ولد حبيب وذوق وهااادي من زملانا في قسم الاستضافة عاد حقين الاستضافة عندنا في ابعاد النفسيات دايم زفت معنا يالاقسام الثانيه مدري ليه ؟
يمكن عشان شغلهم مافيه متعه مثلنا ومتوترين دايم من زود الحرص على السيرفرات والمواقع .

لا امزح كلهم حلوين ورايقين ووسعة صدر


احمد بولاد :
مصمم وولد فنان لكن لا تنتقد تصميمه على طول يحمر وجهه ويبدا يغير الموضوع
بس جلسناله جلسه محترمه في ورشة العمل وطلع لنا ستايل رمضان الراائع ماشاء الله عليه

اربعتنا تقول طالعين كشته كلن كلم اهله وقال لهم لا تنتظروني مدري متى بجيكم طبعا محد يدري والسبب : راجع تعريفي لابو نواف اعلاه بيمسك بك خط انسى تروح .

من يوم الاربعاء بعد صلاة العشاء بدأنا ورشة العمل وشفنا الشمس يوم الجمعه

نمنا طبعا غطات سريعه في المكاتب والاكل مافيه الا هارديز طالع وكنتاكي داخل لازم طبعا التغذيه مهمه في المعسكرات اللي زي كذا
والصلاة بالدور الاول في نفس البرج صل وتعال كمل شغلك مافيه فركات

الحمد لله انجزنا شغل كثير البرمجه خلص ابو نواف شغل اسبوع في هالورشة طبعا هو يكمل اللمسات الاخيرة على الترجمه وترقية الهاكات وتشييك الهاكات الجديدة ونظام الحماية وووووووو

وانا واحمد بولاد انجزنا 9 ستايلات للكمبو بما فيها ستايل رمضان للكمبو وستايل لانفنتي غير صورة المنتج والبانرات الاعلانية والاوسمه والايقونات ووو .

وائل كان حلقة الوصل مابين ابعاد المعلومات على النت ومابينا في ورشة العمل ، متابعة تذاكر واستقبال طلبات وتموين غذائي للمحاربين القدامى اللي هم حنا

من امريكا ( علي حمد ) معسكر هناك عند السيرفرات ومعلن حالة التأهب لانه عارف كلنا بالورشة وحسب ما سمعت انه رفع حالة التأهب للون البرتقالي ، عاد مدري الظاهر هو اقوى شي

محمد نور ونواف وسطام كلن ماسك له زاوية اللي دعم فني واللي تنفيذ واللي مبيعات الكل مدهر يبي يغطي خانه وماتسمع غير همس الشباب في ورشة عمل ، الشباب في ورشة عمل اهوصصصص


المهم حبايبنا كله كوم واللي حصل يوم الجمعه كوم ثاني
بعد ما انهينا ورشة العمل وانجزنا عمل طيب ولله الحمد بدت تظهر علامات الاعياء

بصراحه ابو نواف انهار جسدياً حتى انه ماقدر يروح للبيت فقرر يرتاح شوي بالمكتب حتى يقدر ياصل بيتهم
انا تحاملت على نفسي ووصلت البيت وانا حاس اني تعبان لدرجة التسامي
"التسامي : التحول من الحالة الجامده للغازية بدون المرور بالحالة السائله "


احمد ووائل راحوا زحف للمصعد

والحمد لله كان وقت صعب وعديناه وانجزنا المهمه

كتبت هالموضوع من باب الترفيه من ناحية واهداء للزملاء في ابعاد المعلومات واشكرهم على جهودهم وانا سعيد اني اعمل معاهم كفريق رائع فعلاً .


من ناحية ثانيه انقل لكم ماحصل وانقل لكم فكره بسيطه عن الجهود اللي بذلها فريق العمل ونتمنى ان نكون وفقنا في تقديم ما ينال رضاكم واعجابكم في الكمبو الجديد

والى لقاء في ورشة عمل جديدة وانجاز جديد

تحياتي