[l3bxl3b]

اخوانى هذا اقباس من موضوع قامت احدى اخواتنا فى منتداى بوضعه واحببت ان اشارككم فيه واخد رأيكم يمكن نستفيد اكتر

إقتباس: نهار خارجي مكان ما في قلب القاهرة - صيف 2006 الشمس الحارقة تلسع قفا كل من هو موجود في المشهد.. مجموعة كبيرة من المتظاهرين ترفع عددا من اللوحات المكتوب فيها مطالبهم، هتافات تردد شعارات وأغاني ثورية، قوات الأمن تحيط بالمظاهرة التي تضم شبابا ورجالا وسيدات وآنسات حلوات جميلات.. من على بعد يقف اثنان من الرجال يتأملان المظاهرة ينظر أحدهما للآخر ثم يقول له ضاحكا في سخرية وهو يشير إلى المظاهرة: بذمتك دي مش مسخرة؟ أنا عاوز أعرف إيه اللي نزّل البنات دول مظاهرة زي دي؟ يعني خلاص خلصوا الطبيخ والغسيل في البيت ونازلين الشارع عشان يطالبوا بحقوق الوطن؟! مالهم هم ومال المظاهرات والكلام ده؟ مش عارف يا جدع دول مالهمش أهل ولاّ إيه؟ الواحد بقى بيشوف حاجات غريبة اليومين دول؟ يرد عليه زميله وهو يطلق دخان سيجارته: لأ ويقول لك مناضلات... سلامات يا نضال! والله أنا بيتهيألي إنهم نازلين المظاهرات دي عشان يقابلوا العيال أصحابهم.. يا راجل بلاش كلام فارغ.. بينا ع القهوة نلعب لنا كام دور طاولة! *** نهار خارجي مكان ما في قلب القاهرة - مارس 1919

إقتباس: الشمس الحارقة "مش قوي يعني" تلسع قفا كل من هو موجود في المشهد.. مجموعة كبيرة من المتظاهرين ترفع لوحات ولافتات تطالب بالإفراج عن "سعد زغلول" ورفاقه وتحقيق مطالبهم الداعية إلى استقلال مصر من الاحتلال البريطاني، وفي الخلفية يرفرف علم مصر الأخضر الذي يتوسطه هلال أبيض وثلاث نجوم.. قوات الاحتلال تحيط بالمظاهرة التي تضم شبابا ورجالا وسيدات وآنسات حلوات كثيرات معظمهن يرتدين الملاية اللف المصرية الشهيرة... من على بعد يقف اثنان من الرجال يتأملان المظاهرة يقول أحدهم للآخر في حماس شديد: شايف البنات الجدعان؟ والله الواحدة منهم بميت راجل.. مش خايفين من أي حاجة.. يعني طالعين يهتفوا ويطالبوا بالحرية لـ"سعد زغلول" ولمصر كلها.. يرد عليه الثاني في حماس مماثل: هم دول البنات اللي بجد.. مش اللي قاعدين في البيوت ياكلوا ويشربوا ويطبخوا ويغسلوا الصحون.. يمد الأول يده إلى الثاني ويجذبه وهما يجريان نحو المظاهرة: يلاّ يا راجل.. عيب علينا قوي إن البنات تشارك في المظاهرة وترفع صوتها تطالب بحقها واحنا قاعدين زي الحريم في البيوت! *** ممكن تكون شفت أو حتى تكون طرف في المشهد الأول يعني ممكن تكون واحد أو واحدة من اللي بيشاركوا في المظاهرات، وممكن تكون من الرجالة اللي بيقعدوا على القهوة ومش متقبلين مطلقا فكرة إن البنات تشارك في المظاهرات.. وطبعا مستحيل تكون عشت أحداث المشهد الثاني.. إلا إذا كان عمرك دلوقت معدي التمانين سنة!. وعموما ده يشرفنا جدا إن لينا قراء عمرهم قد كده.. بس إنت أكيد مصدقنا.. وأكيد عارف إننا مش بنضحك أو نكذب عليك وعارف إن المشهد التاني حصل سنة 1919 صحيح ماحصلش بحذافيره وبنفس الكلام والسيناريو.. بس حصل فعلا إن خروج السيدات والبنات إلى المظاهرات أيام ثورة 1919 كان سببا رئيسيا في تفجير طاقات عدد كبير من الرجال وإشعال حماسهم وغيرتهم ولسان حالهم بيقول: "عيب يعني البنات تطلع في مظاهرة واحنا قاعدين كده زي خيبتها!" الغريب بقى إنه سنة 1919 ماحدش جه في باله إن خروج البنات في المظاهرات عيب أو حرام أو قلة أدب. ماحدش جه في باله إنه يمنع أخته أو مراته من إنها تخرج في مظاهرة تطالب فيها بالإفراج عن "سعد" ورفاقه والحرية لمصر.. ماحدش قال للبنات المتظاهرات: اختشوا عيب.. مكانكم في البيت.. لكن دلوقتي واحنا في سنة 2006 ممكن تلاقي اللي يقول ده وأكتر منه كمان. لدرجة إن فيه بعض الناس ممكن يتهموا البنات اللي بتشارك في المظاهرات بإنها خارجة عشان تعمل استعراض وعشان تظهر نفسها على إنها البنت المثقفة اللي بتدخل في مظاهرات.. وممكن كمان يظن البعض إن البنات دول داخلين المظاهرات علشان.....!! والسؤال هنا هو مين الصح؟ أهالينا سنة 1919 ولاّ احنا دلوقت سنة 2006 وإيه السبب اللي خلّى بعض أفكارنا تتغير خلال السنين دي؟ ويا ترى إنتِ لو بنت.. وجت لك الفرصة إنك تخرجي في مظاهرة هتوافقي وتشاركي فيها فعلا، ولاّ هتفكري أكتر من مرة وفي الآخر هيكون رأيك "لأ ماينفعش.. عيب" ولو إنت ولد.. وماشي في الشارع ولقيت مظاهرة تشارك فيها بنات هتبص للبنات دول ازاي؟ هتشوفهم أبطال وجدعان.. ولاّ بنات فاضية مش وراها حاجة! ولو أختك مثلا.. جت وقالت لك عاوزة أشارك في مظاهرة.. هتمسك إيديها وتقول لها: يلاّ بينا.. ولاّ هتقول لها: عيب يا بنت.. اختشي!

كان ردى عليها التالى وفى انتظار تعليقكم

إقتباس: 1 : اما فعلا تخلصوا اللى وراكوا سواء كان غسيل او طبيخ او او او او ( وشوفوا كام او ؟!! ) تبقوا تنزلوا للمظاهرات 2 : اما ينعدم وجود الرجالة تبقوا تنزلوا للمظاهرات 3 : اما تسمعوا عن ام المصريين الثانية ابقوا انزلوا للمظاهرات 4 : اما الوضع يتأزم فى بلدك فقط ابقوا انزلوا للمظاهرات 5 : اما تبقوا بشنبات ابقوا انزلوا للمظاهرات 6 : اما يموت كل صوت ناطق بالحق والثورة من الرجال ابقوا انزلوا للمظاهرات على فكرة انا مش ضد ان المرأه تنزل فى المظاهرات بس ام المصريين اما نزلت وشجعت الآلاف من النساء ينزلوا معاها كان عشان زوجها واللى هو رمز الوطنية فى ذلك الوقت كان معتقل فى السجن , كمان هاتولى مظاهرة تانية نزلت فيها الستات مش هتلاقوا .. طيب عدوا معايا كام مظاهرة قام بيها الرجال فى كل المجالات !!!!!! وصلتوا لكام فى العدد ؟ اظن كتير ..... عارفين يا بنات لو كل واحدة فيكوا فكرت صح وفهمت انكم نعمة كبيرة جدا جدا للرجل ومش مجرد خدامه للراجل هتعرف قد ايه هى مهمة فى حياه اى راجل لانها هى الوحيدة اللى بتخفف عنه فمعناه ايه انها تنزل وتعمل مظاهرات وتقلب (ذكر) طيب احسبيها كده وهنفرض سوا ان جوزك من الثوار وراجع من ثورة او مظاهرة وتعبان ومضروب 30 رصاصة من الامن المركزى او عينه باظت من القنابل المسيلة للدموع هتعملى ايه والنبى هتنزلى تثورى انتى كمان ولا ساعتها تقولى لا جوزى اهم ؟! ... طيب لو فكرتى كده وقلنا ليه للذكر مثل حظ الانثيين ؟ طيب ليه شهادة المرأه بنصف شهادة الرجل ؟ طيب ليه الراجل هو اللى بيتعب ويشتغل وياخد مرتب ويصرف عليكوا ؟ طيب ليه ملكوش عضلات وكل يوم بتبنوا وتشيدوا مبنى جديد ؟ ليه لو حدفت على اى واحدة ريشة هتقع ؟ طيب ليه معندكوش ذقن ؟ ليه معندكوش شنب ؟ ... عايزه المساواه ؟ اعملى كل اللى فات ده واحنا مستعدين نهتم بالاولاد وما عليكى الا انك ترضعيهم .. ليه قلبك احن من قلبنا ؟ ليه انتى ناعمه وليه انا قاسى وخشن ؟ ليه النظرة ليكى ممكن تنسينى هموم دنيتى ؟ ليه بتطلبى الامان بدام فاكره نفسك تقدرى توفريه لوحدك ؟ ليه بتتجوزى طيب ؟ ليه حضن جوزك بيحسسك بالامان عن اما تنامى فى حضن والدتك او اختك ؟ ليه الرسول صلى الله عليه وسلم قال فيما معناه : ان لو أمرت المرأه لتسجد لغير الله لسجدت لزوجها ؟؟ ... طيب ليه بتكرهى تلبسى النقاب ؟! ليه بتستتقلى دم الحجاب ؟ ليه معتقده انك تقدرى تتساوى بالراجل ؟ ليه عندك شعور انك ممكن تبقى افضل منه ؟ طيب ليه متمسكة بفيلم مراتى مدير عام ونفسك تتنططى على كتف الراجل ؟ عارفة انتى ايه سيدتى ؟ انتى اللى من غيرك الدنيا متمشيش ولا يبقى فيها حيات .. انتى اللى بدونك الارض تدمر وتموت ,, انتى اللى من غيرك الراجل ملوش اى قيمة ,, انتى اللى من غيرك يظهر اليأس والتخاذل ,, انتى اللى من غيرك تبقى الدنيا حرب ودمار ,, انتى اللى من غيرك منقدرش نعيش وناكل فى بعض ,, انتى اللى من غيرك تنعدم الابتسامة ويموت الحنان ,, انتى دنية الراجل والحاجة الحلوة اللى بتديله الامل فى بكرة .. هل ترضى انى ارجع من الشغل او من عملى ايا كان واجدك بدل ما نتى مبتسمه وتضمينى عشان انسى كل متاعبى الاقي ذراع قوى قاسى يضمنى من اثر العاب كمال الاجسام ؟! هل تقبلى ان تكونى اكثر خشونه منى ؟ هل ترى فى نفسك انكى تستطيعين حفر قناه السويس لو كنتى فى ايامها ؟ ,, هل ترى فى ذاتك انك اشد براعه من مصطفى كامل وقاسم امين ورفاعه الطهطاوى .. هل حصلتى على جائزة نوبل كأدينا نجيب محفوظ او حتى عالمنا الجليل احمد زويل ؟ ما انتى الا نسمة رقيقة لا يصح ان تهب على ارض ثائرة او جو غابر .. الست ست والراجل راجل : هكذا تقال المقولة الشهيرة .. مستحيل تنزلى لمظاهرة وراجلك موجود دى بجد تبقى عدم الرجولة ازاى اسيبك تنزلى وسط الرجال ( لو كانت المظاهرة مشتركة ) ولا حتى ازاى اضحى بيكى بكل سهولة لو اتقبض عليكى من الامن ؟؟ عارفة ايه ممكن يحصل ؟ انتى متصورة ان بنزولك للمظاهرة بتحققى حاجة ؟ لا عادى جدا انتى فى نظر الحكومة فرد عادى جدا معاكى بطاقة زى اى حد تشغلى حيز من الفراغ تبقى انسانه وخلاص . كمان عمرك ما هتستهلكى اكثر من رصاصة زى الراجل بالظبط .. وعموما اما نشوف انتى بتفكيرك ده صح ولا الدين والشرع اللى بيقول ان الكلمة الاولى والاخيرة للرجل وللذكر مثل حظ الانثيين وغيرررررره كتيييييير .. منكرش زى ما قلت فوق انكم بتقدروا تعملوا حاجات ميعملهاش مليون راجل .. ده كفايه انك مربية اجيال ومن غيرك فعلا الدنيا هتبقى مجزرة موحشة ... عارفين الموضوع كبير وانا تعبت من الكتابه فيه ولكن اللى استفز لوحة مفاتيحى وجعلها تكت ما كتبت هو الموضوع نفسه حيث اننى اعهد حاليا بتأليف كتاب عن حقوق المرأه فى المجتمع الشرقى .. الخلاصة : لا اقبل بنزول المرأه فى اى مظاهرة عمال على بطال ولكن يجب ان يكون ذلك بشكل منظم وان يكون الموضوع كبير قوى عشان يخلى المرأه تسيب كل اللى قلته ده وتنزل لمظاهرة . اسف للاطالة جدا جدا واشكر صاحبة الموضوع .... مروان الظاهر